RU

Оқушының ата-анасы вакцина алмаса, бала мектепке бара ала ма: Министр жауап берді

оқушы
Көрнекі фото: qazaqstan.tv

Оқушының ата-анасы коронавирусқа қарсы вакцина салдырмаса да, бала мектепке барып оқи береді. Себебі бұл – баланың құқығы. Білім және ғылым министрі Асхат Аймағамбетов ел көкейінде жүрген сұраққа жауап беріп, түсініктеме берді деп жазады KAZ.NUR.KZ.

Министр бұл мәселе жайында Нартай Аралбайұлына берген сұхбаты кезінде айтып өтті.

"Біріншіден, баланы мектепке бару құқығынан айыра алмаймыз. Екіншіден, ата-анасы ауырмаса, ауырған адаммен байланыста болмаса, балаға неге мектепке бармасқа? Ата-аналардың статусын да қарап отырамыз. Егер мектепке келген баланың, университетке келген студенттің дене қызуы болса, ата-анасы ауырса, сол сыныптағы баланың індетті жұқтырғаны анықталса, ол бала 14 күн қашықтан оқу форматына ауыстырылады", - деді Аймағамбетов.

Ал балалардың вакцина салдыру-салдырмауы білім министрлігінің өқзырында емес.

"Бұл мәселені талқылап жатқан жоқпыз, өйткені ол біздің құзіретімізде емес. Біз білім және ғылым министрлігіміз. Сарапшылар, денсаулық сақтау министрлігі офлайн оқуға құқық беріп отыр. Министрліктің жұмысы – тиісті жағдайды ұйымдастыру", - дейді министр.

Сұхбат барысында Асхат Аймағамбетовке "мектепте жұмыс істейтін мұғалімдер мен техникалық қызметкерлердің вакцина құжатын сатып алмағанына министрлік кепілдік бере ала ма?" деген сұрақ қойылды. Министрлік басшысы бұл сауалға да нақты жауап берді.

"Оған кім қай жерде кепілдік береді? Бұл тек білім саласына ғана емес, барлық салаға қатысты мәселе. Біздің жүйеде 500 мың мұғалім бар. Сол 500 мың адамның барлығы вакцинаға қатысты дұрыс шешім қабылдағанына кепілдік бере аласыз ба? Бере алмайсыз. Бұл тұрғыда әріптестеріміздің санасына сенеміз, ұстаз болғаннан кейін мәселені түсінеді деп ойлаймын", - деп жауап берді министр.

Биыл 2021-2022 оқу жылында қазақстандық оқушылар дәстүрлі форматта білім алады. Мектепке педагогтер, қызметкерлер мен ата-аналар Ashyq қосымшасы арқылы ғана кіре алады.

Бірінші қыркүйекте жаңа оқу жылының басталуына арналған дәстүрлі салтанатты шара далада өтеді. Мұндай салтанатты жиында бірінші сынып оқушыларына "Әліппе" табысталады.

Мақаланың түпнұсқасы: https://kaz.nur.kz/society/1928813-oqusynyn-ata-anasy-vakcina-almasa-bala-mektepke-bara-ala-ma-ministr-zauap-berdi/