"Барлығы алты жарылыс болды": Жамбыл облысындағы жарылыстан шамамен 32 адам жараланған

Жамбыл облысындағы әскери бөлім қоймасында болған жарылыстан шамамен 32 адам жараланған. Бұл туралы Қорғаныс министрлігінің баспасөз қызметі мәлімдеді деп хабарлайды KAZ.NUR.KZ.

Жарылыстан зардап шеккендер Тараздағы №1 ауруханаға жеткізілген.

"Бүгін сағат 19.00 шамасында Жамбыл облысындағы әскери бөлімде қоймалардың бірінде шыққан өртті жою жалғасуда.

Әскери бөлімнің өрт сөндіру командалары мен шынжыр табанды арнайы өрт сөндіру техникасы, сондай-ақ Жамбыл облысы бойынша ТЖД-ның өрт сөндіру есептоптары жұмылдырылды.

Қоймада көбінесе ұзақ қашықтыққа қабілетті емес инженерлік оқ-дәрілер сақталады. Барлығы 6 жарылыс болды.

Сонымен қатар, халықтың қауіпсіздігін қамтамасыз ету мақсатында жақын маңдағы үйлердің тұрғындарын эвакуациялау басталды. Медициналық көмекке жүгінген 32 зардап шегуші туралы мәліметтер бар, оның ішінде 10-ы әскери қызметші", - деліген ведомствоның баспасөз хабарламасында.

Еске салсақ, бұған дейін Жамбыл облысында әскери бөлім қоймасының маңынан өрт шығып, жойқын жарылыс болғаны хабарланған еді.

Төтенше жағдайға байланысты мемлекет басшысы Қасым-Жомарт Тоқаев Twitter әлеуметтік желісіндегі парақшасында пікір білдірді.

Президент оқиға орнына шұғыл түрде Қорғаныс және Төтенше жағдайлар министрі сондай-ақ, Ішкі істер вице-министрі аттанғанын және аталмыш факті бойынша қылмыстық іс қозғалғанын мәлім етті.