Қазақстанда әскерге шақырудың күзгі науқаны басталды

Бүгін, бірінші қыркүйекте әскерге шақыру науқаны басталды. Ол осы жылдың соңына дейін жалғасады. Осы уақыт ішінде Қарулы Күштердің, басқа да әскерлер мен әскери құралымдарының қатарын 18-27 жас аралығындағы он жеті мыңға жуық жас азамат толықтырады деп жазады Қорғаныс министрлігінің баспасөз қызметі.

Жергілікті атқарушы органдар "Әскери қызмет және әскери қызметшілердің мәртебесі туралы" Қазақстан Республикасының Заңына сәйкес азаматтарды мерзімді әскери қызметке шақыруды ұйымдастырып, қамтамасыз етеді.

Әскерге алынған күннен бастап 12 ай қызмет атқарған әскери қызметшілерді запасқа шығару да жоспарлы тәртіппен жүргізіледі.

"Екінші жыл қатарынан әскерге шақыру науқаны пандемия жағдайында өтуде. Коронавирусты жұқтыру қаупін азайту үшін әскерге шақырылушыларды хабардар ету Цифрлық даму, инновациялар және аэроғарыш өнеркәсібі министрлігінің 1414 қызметімен SMS-хабарламалар жіберу арқылы жүзеге асырылады" делінген хабарламада.

Вирустық инфекциядан қосымша қорғаныс ПТР-тексеру болып табылады. Әскерге шақырылушыларды екі рет тексереді. Әскерге шақыру кезінде жинау пункттерінде және әскери бөлімдерге жаңа толықтырулар келгеннен кейін.

"Барлық сұрақтар бойынша азаматтар электрондық пошта немесе қорғаныс істері жөніндегі департаменттердің әлеуметтік желілердегі ресми аккаунттары арқылы хабарласа алады. Сыбайлас жемқорлық көріністері туралы хабарламалар әҚарулы Күштер – адалдық алаңыә жобалық кеңселерінде және сенім телефондары арқылы қабылданады", – деп түсіндірді Қарулы Күштер Бас штабы Ұйымдастыру-жұмылдыру жұмыстары департаментінің бастығы полковник Сәкен Жүсіпов.

Естеріңізге сала кетсек, өңірлердегі әскерге шақыру комиссияларын облыс, қала және аудан әкімдерінің орынбасарлары басқарады. Олар әскерге шақыру комиссиясының шешімімен немесе медицина мамандарының қорытындыларымен келіспеген азаматтардың өтініштерін қарайды.