RU

"Қазақстандықтардың барлық деректері Ресейге қолжетімді болады": Бағдат Мусин желіде туындаған дауға пікір білдірді

Бағдат Мусин
Фото: Орталық коммуникациялар қызметі

Қазақстан Ресейдің Сбербанк компаниясымен келісімшартқа отырған соң "қазақстандықтардың барлық деректері Ресей Федерациясына қолжетімді болады" деген әлеуметтік желідегі шуға байланысты Цифрлық даму, инновациялар және аэроғарыш өнеркәсібі министрі Бағдат Мусин өзінің Facebook парақшасында жауап берді.

"Әлеуметтік желілерде туындаған сұрақтарға барынша бір пост арқылы түсініктеме беріп, ақпарат тапшылығына және бұрын айтылған ақпараттың дұрыс түсіндірілмеуіне байланысты пайда болған көзқарастардың басын ашқым келеді.

Біріншіден, eGov порталы тек қана Қазақстанға тиесілі және ешкімге берілмейді. "Қазақстандықтардың барлық деректері Ресей Федерациясына қолжетімді болады" деген түсінік қисынсыз", - дейді министр.

Бағдат Мусиннің сөзінше, тәуелсіздік алғалы бері елімізде шетелдік құрылымдарда жұмыс істейтін көптеген мекемелер бар. Алайда, олардың бәрі біздің мәліметтерді ала алады деген сөз емес, дейді министр.

"Электрондық үкіметке келетін болсақ, бұл жерде біреу біреуге ақпарат береді деген сұрақ туындамауы да керек. Жалпы, "eGov.kz" не екенін қысқаша түсіндірейін.

eGov - бұл барлық мемлекеттік базалармен байланыстырылған "витрина" ғана. Бұл базаларға немесе жүйелерге ешкім ешқашан қол жеткізе алмайды! Өткен айда басталған талдау қазақстандық мемлекеттік секторда 400-ден аса ақпараттық жүйе бар екенін көрсетті. Бұл мемлекеттік жылжымайтын мүлік базасы сияқты ірі базалардан бастап, олимпиада жүлдегерлері тіркелген шағын базаларға дейін.

Ағымдағы кезеңде біздің міндетіміз - әртүрлі технологияларда жазылған, кейде бағдарламашы этикасы мен ескірген құжаттамасыз жүздеген жүйелердің орнына, барлық деректер бірыңғай платформада реттелген және түсінікті болатын ондаған жүйелерге өту.

Қазір eGov-ты миллиондаған ескі құрылғылармен салыстыруға болады, олардың орнына біз сапалы заманауи технологиямен жабдықталған платформаны орнатқымыз келеді. Бізге халық үшін де, экономика үшін де барынша оң нәтижеге жету мақсатында цифрландырудың "құрақталған" моделінен тұтас платформалық моделіне өтетін кез келді.

IT саласындағы кез келген шешім, әсіресе халықаралық шешім кибер қалқан мен азаматтардың мүдделерін қорғау жөніндегі уәкілетті органдардың ұсынымын ескере отырып қабылданады. Біз Қазақстан тарапы бағдарламалық қамтамасыз ету мен техникалық қолдауды талап ететін вендор сияқты болуы керек деген талап қойып отырмыз. СБЕР барлық қызметтерді қолжетімді ете отырып, барлық компоненттердің бастапқы кодтарын көрсетеді және барлығын Қазақстандағы серверлерге орналастырады деп келістік", - дейді ол.

Екіншіден, министрдің сөзінше, бөлінетін 500 млн-ның барлығы СБЕР-ге жұмсалмайды.

"Меморандум – келісімшарт емес. Үкімет цифрлық трансформация мүмкіндігін қарастыратын меморандумға қол қойды, оның бағалау құны шамамен 500 млн. Бұл не деген сөз? Бұл аталған соманың бір бөлігі жергілікті IT нарығына инвестицияланатынын білдіреді. Бұл қаражатты қазақстандық компаниялар платформалық тәсілді енгізу бойынша жұмыс шеңберінде жұмсайды. Соманың екінші бөлігі - инфрақұрылымдық шешімдерге кетсе, үшінші бөлігі ғана СБЕР-ден шешімнің өзін сатып алуға арналатын болады", - дейді ол.

Бағдат Мусиннің айтуынша, платформалық модельді енгізуге Қазақстанның IT компаниялары міндетті түрде қатысады.

"Платформалық модельді енгізудің таныстырылымы мен талқылауы қоғам белсенділері мен IT нарық өкілдірінен тұратын сараптамалық комиссиямен (70-те 30) бірлесіп өтетін болады. Ниет білдірушілер жекеге өз байланыс мәліметтерін қалдыра алады, сараптамалық кеңес тізімін жасау кезінде ескеретін боламыз. СБЕР платформаның қалай жұмыс істейтінін көрсететін, оқытатын сарапшылармен сессиялар ұйымдастырады, содан кейін ғана біз платформада жұмыс істейміз. Бұл жобаны іске асыруға біздің IT компаниялар жұмылдырылады", - дейді министр.

Мақаланың түпнұсқасы: https://kaz.nur.kz/society/1931983-qazaqstandyqtardyn-barlyq-derekteri-reseige-qolzetimdi-bolady-bagdat-musin-zelide-tuyndagan-dauga-pikir-bildirdi/