RU

Нұр-Сұлтанда медицина қызметкерлері вакцина паспортын құпия сөз бойынша сатып келген

Ашық
Көрнекі фото: NUR.KZ/Петр Карандашов

Нұр-Сұлтан полицейлері жалған вакцина паспорттарын сатумен айналысқан үш адамды ұстады деп хабарлайды Sputnik Қазақстан.

Жалған құжат дайындады деген күдікке 38 бен 40 жастағы екі медицина қызметкері және олардың бірінің 44 жастағы күйеуі ілінді.

Анықталғандай, медицина қызметкерлері соңғы үш ай бойы ақшаға жалған вакцинация жүргізген.

"Ақхалаттылар жалған құжат алғысы келгендерді таныстарының кеңесі бойынша қабылдаған. Медицина қызметкерлерінің бірінің күйеуі клиенттерді тауып, олармен сөйлесіп, ақысын алдын ала алып отырған. Медициналық мекемеге келген кезде адамдар жалған анықтама алу үшін құпия сөзді айтқан", - деді полициядағылар.

Медицина қызметкерлерінің өздері қылмыс жасағанын мойындады.

Ұсталғандарға қатысты Қылмыстық кодекстің 385-бабы "Жалған құжаттарды қолдан жасау, дайындау немесе өткiзу" бойынша сотқа дейінгі тергеу жүріп жатыр. Олар төрт жылға дейін бас бостандығынан айырылуы мүмкін.

Сондай-ақ полицейлер бұл дәрігерлерден кімдер жалған вакцина паспортын сатып алғанын анықтап жатыр.

Мақаланың түпнұсқасы: https://kaz.nur.kz/society/1932625-nur-sultanda-medicina-qyzmetkerleri-vakcina-pasportyn-qupiya-soz-boiynsa-satyp-kelgen/