Қазақстан мектептерінде ЛГБТ құқықтары туралы сабақтар жүріп жатқаны рас па: БҒМ жауабы
Опубликовано:
Қазақстандықтар әлеуметтік желілер мен мессенджерлерде орыс тілі сабағында оқушыларға ЛГБТ-қоғамдастық өкілдерінің құқықтары туралы айтылып жатқаны жөнінде хабарлама таратуда. Бұл ақпаратты еліміздің Білім және ғылым министрлігі жоққа шығарды деп жазады stopfake.kz сайты.
Желіде тараған хабарламада Өскемен мектептерінің бірінде ЛГБТ-қоғамдастық өкілдерінің құқықтары туралы сабақ өткізілгендігі айтылған. Бұл туралы желіде өзін 8-сынып оқушыларының бірінің анасымын деп таныстырған әйел жазған.
БҒМ хабарлауынша, аталған факті бойынша қызметтік тергеу жүргізіліп, әйелдің сөздері шындыққа жанаспайтыны анықталған.
"8-сынып оқушысы ата-анасының әлеуметтік желілердегі орыс тілі сабақтарын өткізу туралы хабарламасы бойынша ШҚО білім басқармасы қызметтік тергеу жүргізді. Оқу материалының мазмұны "Отбасы: құқықтары мен міндеттері" бөліміне сәйкес іріктелді. Орыс тілінен осы сабақтың мазмұнына ЛГБТ қауымдастықтары өкілдерінің құқықтары кірмейді. Ата-ана ұсынған ақпарат шындыққа жанаспайды", – делінген ведомство жауабында.
Еске салсақ, бұған дейін 20 қыркүйектен бастап оқушылар мен студенттер қашықтан оқуға көшірілетіні туралы ақпарат шындыққа жанаспайтынын жазған едік.
Онлайн оқыту форматына көшу туралы ақпаратты Санитарлық-эпидемиологиялық бақылау комитеті жоққа шығарып отыр.
Мақаланың түпнұсқасы: https://kaz.nur.kz/society/1932747-qazaqstan-mektepterinde-lgbt-quqyqtary-turaly-sabaqtar-zurip-zatqany-ras-pa-bgm-zauaby/