Аймағамбетов Алматыдағы ЖОО мен мектептердегі қауіпсіздік жүйесін тексерді

Жұмыс сапарымен Алматы қаласына келген білім және ғылым министрі Асхат Аймағамбетов мектептер мен жоғары оқу орындарында болып, педагогтармен, ведомстволық бағынысты ЖОО-ның ректорларымен және ғылыми-зерттеу институттарының басшыларымен кездесті деп хабарлайды KAZ.NUR.KZ.

Бұл жөнінде министр өзінің Facebook-тегі ресми парақшасында мәлім етті.

Аймағамбетов мектептегі күзет жүйесінің, бейнебақылау камераларының жұмысымен, дабыл түймелерінің, турникеттердің орнатылуымен танысқанынын баяндады. Сондай-ақ, мектептер, колледждер, ЖОО басшыларына және әкімдіктер мен министрлікке балалардың қауіпсіздігін арттыру бойынша жұмысты күшейту қажет екенін тапсырды.

"Соңғы қайғылы оқиғалар мәселенің өзектілігі мен маңыздылығын көрсетеді. Әрине, бұл шаралардан бөлек тәрбие жұмыстарын да жүргізу қажет. Психологтар мен әлеуметтік педагогтердің жұмысы, сонымен бірге балаларды форс-мажорлық әрекеттер туралы хабардар ету маңызды.

Мектеп директорларымен кездесу кезінде аттестация, басшылар ротациясы, әдістемелік жұмысты ұйымдастыру мәселелері де талқыланды. Біз Жолдау аясында айтылған Президент тапсырмаларының нақты қалай жүзеге асырылатынына жеке тоқталып өттік. Мектеп директорлары көптеген жақсы ұсыныс пен идея айтты, біз оларды алдағы жұмысымызда ескереміз.

Жалпы, мұғалімдермен және мектеп директорларымен сөйлесе отырып, сұрақтардың мазмұны, мысалы, бір жыл бұрын қойған сұрақтарға қарағанда өзгергенін байқадым және бұл қуантарлық жағдай. Былтыр күн тәртібінде тұрған мәселелердің басым көпшілігі шешімін тапты.

Енді талқыланатын тақырыптар оқу бағдарламаларының мазмұнына, ата-аналармен өзара әрекеттесуге, тәрбие жұмысына әлдеқашан тереңірек енгізілген.

Дәстүрлі форматқа оралуды талқылай отырып, ұстаздар, жалпы алғанда, оқушылардың жалпы санының сырқаттанушылық деңгейі қашықтан оқытуға өтініш бергендердің көрсеткішінен әлдеқайда төмен екенін айтты. Мектеп оқушылары мен ата-аналардың басым көпшілігі офлайн режимде оқуға риза. Бұл білім сапасына, балалардың эмоционалды жағдайына және олардың денсаулығына оң әсер етеді", - дейді Асхат Аймағамбетов.

Сонымен бірге, министр мектептерде жан басына қаржыландыруды енгізудің тиімділігі мен артықшылықтары туралы сөз болғанын жеткізді.

"Осы жүйенің арқасында мектептер ауқымды қаржылық ресурстарға, үлкен қаржылық тәуелсіздікке ие болды, тиісінше қаржыны тиімдірек жұмсауға және маңызды мәселелерді шешуге қаражатты үнемдеуге және қайта бөлуге ынталандыру пайда болды.

Модернизациядан өткен мектеп кітапханасын араладым. “Оқуға құштар мектеп” жобасын жүзеге асыру үшін мектеп кітапханасының кітапхана қоры көркем әдебиетпен толыққаны байқалады.

Сонымен қатар, Абай атындағы ҚазҰПУ-де болдым. Министрлікке бағынышты ЖОО-ның ректорларымен кездесу өткіздім. Қорытындысы бойынша студенттердің қауіпсіздігі, сондай-ақ құрылысқа, жатақханаларды қайта құруға, оқу үдерісіне де қатысты бірқатар тапсырма бердім.

Сонымен қатар ғылыми-зерттеу институттарының директорларымен кездестім. Әріптестерімізбен Мемлекет басшысының Жолдауы аясында ғылым туралы заңнамаға енгізілетін жаңа түзетулерді талқыладық.

Ғылыми гранттарды қаржыландыру шарттарының ұлғаюы, іргелі зерттеулермен айналысатын мекемелерге тікелей қаржыландыруды енгізу, негізгі қаржыландырудың ұлғаюы және ғалымдар өз баяндамаларында бұрыннан айтып жүрген басқа да өте маңызды өзгерістер.

Кездесулерде айтылған барлық ұсыныс пен сұрақ ескерілді және олар бойынша тиісті жұмыстар жүргізіледі. Соңында «Қазақстан Ұстазы» сыйлығы иегерлерін марапаттау рәсіміне қатысып, әріптестерді келе жатқан кәсіби мерекемен құттықтадым", - деп түйіндеді жазбасын министр.