Болашақпен оқуға түсушілерге қандай талаптар қойылады

"Халықаралық бағдарламалар орталығы" акционерлік қоғамының президенті Айнұр Қарбозова білім және ғылым министрлігінің ақпарат жиналысында "Болашақ" стипендиясына құжаттарды қабылдау барысы және атқарылып жатқан жұмысы туралы баяндады деп хабарлайды BAQ.KZ.

"2020 жылы 6 мамырда Үкімет Қаулысымен бекітілген жаңа іріктеу ережесіне сәйкес сапалық өзгерістер шеңберіндегі барлық үміткерге ортақ талап қойылады. Басым мамандықтар тізбесінен мамандығы бойынша ұсынылатын ЖОО тізіміне енгізілген шетелдік ЖОО-дан шартсыз шақырудың болуы. Бұл – бірінші талап. Екіншіден, мемлекеттік тілді игеру көрсеткіші Қазтесттің кемінде В1 көрсеткішін алу. Яғни, 105 сұрақтың кемінде 105-іне дұрыс жауап беруі керек", - деді Айнұр Қарбозова.

Оның сөзінше, жоғарыда айтылғандар бағдарламаның негізгі талаптары.

2021 жылы "Болашақ" бағдарламасы шеңберінде 5 оқу бағдарламасы ұсынылған.

Соның ішінде магистратура, ауылды жерлерден қатысатындар үшін магистратура, медицина үшін резидентура, докторантура және тағылымдама.

"Тағылымдаманың шетелде кадрларды даярлау республикалық комиссиясының шешімімен 6 санаты бекітілді.

Олар – ғалымдар, педагогикалық, денсаулық сақтау, инженерлік-техникалық қызметкерлер, мемқызметшілер және мәдениет пен спорт саласы қызметкерлері", - деді Айнұр Қарбозова.

Оның сөзінше, ағымдағы жылы бөлінген шекті стипендия саны – 1 055.

Оның 555-і академиялық магистратура, докторантура, резидентура және тағылымдаманың 5 санатына бөлінеді. Қалған 500 стипендия ғалымдарға бөлініп отыр.

Айта кетейік, қазіргі уақытта құжат қабылдау жүріп жатыр. Яғни, 4 мамырда басталған құжат қабылдау процесі 28 қазанға дейін жүргізіледі.