RU

Алматы облысында жол апаты болып, көлік қақ ортасынан бөлініп қалды

Жол апаты
Көрнекі фото: pixabay.com

Алматы облысында рөлге ие бола алмай қалған жас жігіт жол апатынан көз жұмды деп хабарлайды Sputnik Қазақстан.

"8 қазанда сағат 17:30 шамасында Еңбекшіқазақ ауданында "Алматы-Көкпек-Көктал" тасжолының 39-шақырымында Mercedes-Benz автокөлігінің 20 жастағы жүргізушісі жол апатын жасады. Жас жігіт рөлге ие бола алмай, жолдың қарсы жолағына шығып кеткен, содан кейін Audi C-4 және Toyota Camry автокөліктерімен соқтығысқан", - деп хабарлады Алматы облысы полиция департаментінің баспасөз қызметі.

Жол апатының салдарын куәгерлер видеоға түсіріп алған.

"Mercedes-Benz автокөлігінің жүргізушісі оқиға орнында көз жұмды. Тағы екі адам түрлі жарақатпен ауруханаға жатқызылды", - деп хабарлады полиция.

Mercedes қатты соққыдан қақ бөлінген, қалған екі көлік жапырылып кетіпті.

Полиция Қылмыстық кодекстің 345-бабының үшінші бөлігі (Жол қозғалысы ережесін бұзу) бойынша сотқа дейінгі тергеу жүргізіп жатыр. Қажетті сараптамалар белгіленді.

Мақаланың түпнұсқасы: https://kaz.nur.kz/society/1936227-almaty-oblysynda-zol-apaty-bolyp-kolik-qaq-ortasynan-bolinip-qaldy/