RU

Батыс Қазақстанда 12 сынып карантинге жабылды

Мектеп
Көрнекі фото: pixabay.com

Батыс Қазақстан облысында 1 қазаннан бері 120 оқушыдан коронавирус анықталды деп хабарлайды ҚазАқпарат.

БҚО санитарлық-эпидемиологиялық бақылау департаменті мәлім еткеніндей, осы мерзімде 23 мұғалім дерт жұқтырған.

Облыс бойынша 10 мектепте 12 сынып оқушылары мен мұғалімдерін үй карантиніне көшіру туралы 10 қаулы шығарылды.

Оған қоса, осы айда орта арнаулы оқу орындарында 3, ЖОО-да 8 студенттің ауырғаны белгілі болды. Күн сайын педагогтар мен оқушылар, студенттер мен қызметкерлер арасында мониторинг жүргізілуде.

Департамент мәліметіне қарағанда, 1 қазаннан бері өңірде 701 науқас тіркелді. Соның ішінде 59 пайызы (406) ЖРВИ белгілерімен тексерілсе, 26 пайызы (186) бұрын ауырғандармен қарым-қатынаста болған. 14 пайызынан (102) профилактикалық мақсатта, 1 пайызынан (7) стационарға жатқызар алдында сынама алынған.

Жас ерекшеліктері бойынша 116-сы – 14 жасқа дейінгілер, 45-і – 15-17, 34-і – 18-25, 146-сы – 26-40, 192-сі – 41-60 жас аралығындағылар, 168-і – алпыстан асқандар. КВИ 41-60 жастағылар арасында көбірек анықталып отыр.

Жыл басынан бері Батыс Қазақстанда 28 952 адамнан коронавирус табылды, бұл 100 мың тұрғынға шаққанда 4383,1-ден келеді. Соңғы аптада (7-13 қазан – 363) алдыңғымен (30 қыркүйек – 6 қазан – 395) салыстырғанда індет жұқтыру көрсеткіші 8,1 пайызға төмендеді.

Мақаланың түпнұсқасы: https://kaz.nur.kz/society/1937119-batys-qazaqstanda-12-synyp-karantinge-zabyldy/