RU

Мәжілісте Тәуелсіздіктің 30 жылдығына орай рақымшылық жасау туралы заң жобасы қаралмақ

Нығматуллин
Фото : parlam.kz

Бүгін мәжіліс спикері Нұрлан Нығматулиннің төрағалығымен палата бюросы өтіп, онда алдағы жалпы отырыстың күн тәртібі нақтыланды деп хабарлайды парламент мәжілісінің ресми сайты.

Бюро отырысында депутаттар қарауына "Қазақстан Республикасы Тәуелсіздігінің отыз жылдығына байланысты рақымшылық жасау туралы" заң жобасы ұсынылады.

"Заң жобасы мемлекеттің және азаматтардың қауіпсіздігіне қатер төндірмейтін қылмыстар жасағаны үшін сотталған адамдарды, оның ішінде азаматтардың әлеуметтік қауқарсыз санаттарын жазадан босатуға мүмкіндік береді", – делінген хабарламада.

Күн тәртібінің жобасында депутаттар бастамашы болған "Қазақстан Республикасының сот жүйесі мен судьяларының мәртебесі туралы" Қазақстан Республикасының Конституциялық заңына өзгерістер мен толықтырулар енгізу туралы" Конституциялық заң жобасын және  сот жүйесі мәселелері бойынша заңнамалық түзетулерді бірінші оқылымда қарау көзделген.

"Сонымен қатар, алдағы жалпы отырыста "Қазақстан Республикасының кейбір заңнамалық актілеріне дауларды соттан тыс және сотқа дейінгі реттеу институттарын дамыту мәселелері бойынша өзгерістер мен толықтырулар енгізу туралы" заң жобасын бірінші оқылымда қарау қарастырылған", – деп жазылған ақпаратта.

Сондай-ақ, бюро отырысында депутаттарға кәсіпкерлік қызмет саласында жаңа реттеушілік саясатты енгізу және бәсекелестікті дамыту мәселелері бойынша өзгерістер мен толықтырулар енгізу туралы заң жобасын бірінші оқылымда қарау ұсынылады.

Мақаланың түпнұсқасы: https://kaz.nur.kz/society/1939685-nygmatulin-mazilis-tauelsizdiktin-30-zyldygyna-orai-raqymsylyq-zasau-turaly-zan-zobasyn-qaraidy/