Қазақстанға Pfizer вакцинасының екінші партиясы қашан жеткізіледі

Денсаулық сақтау министрі Алексей Цой үкімет отырысында Қазақстанға Pfizer вакцинасының екінші партиясы қашан жеткізілетінін айтты, деп жазады KAZ.NUR.KZ тілшісі.

"Қазақстанға Pfizer вакцинасының алғашқы партиясы - 379 мың доза жеткізілді. Екінші партия 20 қарашада келеді деп жоспарлануда", - деді министр Цой.

Еске сала кетсек, 10 қарашада Алматыға коронавирусқа қарсы Pfizer вакцинасы жеткізілген еді.

Препарат оңтүстік астанадан Қазақстан өңірлеріне тарайды. Елге жалпы 4 млн дозадан астам вакцина жеткізіледі.

Алдын ала минус 90 градус температурада сақтауға болатын тоңазытқыш камералары сатып алынған.

Дәл осындай температурада вакцина басқа қалаларға жеткізіледі. 46 мың дозасы Алматыда қалады.

Сондай-ақ, елімізде бұдан былай Pfizer вакцинасын ақылы түрде салуға болады.