Қазақстанда тағы екі бағытта Тальго жүрдек пойызы жолға шықты

12 желтоқсаннан бастап енгізілген жолаушылар пойыздары қозғалысының жаңа кестесіне сәйкес "Жолаушылар тасымалы" АҚ Тальго пойыздарын екі бағыт бойынша іске қосты. Бұл туралы "Қазақстан темір жолы" ҰК" АҚ ресми Instagram-аккаунты хабарлайды.

Сонымен, Нұр-Сұлтан – Нұрлы жол станциясынан №603 "Нұр-Сұлтан-Нұрлы жол – Арқалық" жолаушылар пойызы алғашқы рейске шықты. Маршруттың қашықтығы - 609 км, пойыздың жалпы жүру уақыты 12 сағат 49 минутты құрайды.

"Пойыз екі құрамнан құралған және күн сайын қатынайтын болады. Олардың әрқайсысында 348 орындық "Турист" класты, 2 "Бизнес" класты, 1 "Гранд" класты, 1 "Гранд PMR" класты (мүмкіндігі шектеулі жолаушылар үшін) вагондары, сондай-ақ вагон-бар және вагон-мейрамхана бар", – делінген ресми хабарламада. ⠀ Тальго вагондарынан құрастырылған екінші №111 пойызы "Алматы-2-Маңғыстау" бағыты бойынша іске қосылды. Пойыздың жалпы жүру уақыты 41 сағат 49 минутты құрайды.

"Пойыз екі құрамнан тұрады және жұп күндері жүреді. Олардың әрқайсысында 324 орындық "Турист" класты вагондар, сондай-ақ вагон-бар және вагон-мейрамхана қарастырылған", – деп қосты компанияда.