Қызылордада шырша жағу рәсімінде алғашқы ұлпа қар жауды

Опубликовано:

1
Фото: Қызылорда облысының әкімдігі

Жаңа жылдың ажырамас нышаны саналатын шырша жағу рәсімінде Қызылорда қаласында алғашқы қар жауды. Дәстүрге сай Сыр елінің бас шыршасы орталық алаңға орнатылып, облыс әкімі Гүлшара Әбдіқалықова шырша жағу рәсіміне қатысып, тұрғындарды ғажайып сәттерге толы жаңа жыл мейрамымен құттықтап, өңір үшін биылғы жылдың табысты болғанын тілге тиек етіп, әр отбасыға бақ-береке тіледі.

"Баршаңызды келе жатқан Жаңа 2022 жылмен шын жүректен құттықтаймын!

Биыл еліміздің ең басты ұлық мерекесі – қасиетті де қастерлі Тәуелсіздігіміздің 30 жылдық мерейтойын атап өттік. Қандай қиындық болса да, берекелі бірлігіміз бен тату тірлігіміздің арқасында бәріміз бірге еңсеріп, кез келген ауыртпалықты жеңе білдік. Пандемияға қарамастан өңірде бірқатар көрсеткіштер бойынша оң динамикаға қол жеткіздік. Көптеген әлеуметтік маңызы бар құрылыс нысандары,тұрғын үйлер салынды.

Шырша
Фото: Қызылорда облысының әкімдігі

Тәуелсіздік күні қарсаңында ірі индустриялық жоба шыны зауытын іске қостық. Енді оның айналасында қосалқы өндірістерді дамытып, жаңа жұмыс орындарын ашамыз.

Жаңа жылға осындай игі істерімізбен, ізгі үмітімізбен қадам басып отырмыз. 2021 жылды жемісті аяқтасақ, ол - сіз бен біздің бірлесе атқарған еңбегіміздің нәтижесі.

2022 жыл әрбір отбасына мол ырыс-несібе әкелсін! Сыр қамбасы қазыналы болып, берекеміз арта берсін! Жаңа жыл құтты болсын, қадірлі жерлестер!",– деді Гүлшара Әбдіқалықова.

3
Фото: Қызылорда облысының әкімдігі

Ұзындығы 22 метрді, диаметрі 10 метрді құрайтын орталық алаңдағы шырша алуан түрлі ойыншықтармен безендіріліп, түрлі-түсті диодты шамдармен әрленген.

Мұнан соң, өңір басшысы 2020 жылғы Олимпиада ойындарының қола жүлдегері, Әлем чемпионатының екі дүркін күміс жүлдегері, Азия чемпионатының үш дүркін күміс жүлдегері Қамшыбек Қоңқабаев және Македонияда өткен халықаралық ән байқауының І орын, «Бала дауысы» ән конкурсының ІІІ орын иегері, жас әнші Серік Мадиярмен бірге жаңа жылдық шыршаны салтанатты түрде жақты.

4
Фото: Қызылорда облысының әкімдігі

Думанды шарадағы концерттік бағдарлама жаңа жылдық әсер сыйлап, кештің сәнін келтірді.

Айту керек, бүгін Сыр елінде 200 балаға бір мезетте 200 Аяз ата мен 200 Ақша қар Президенттің арнайы сыйлығы табыс етіліп, балалар мерекені сезінді.

Балаларға арналған Президент шыршасы мерекесі аясында облыс әкімі Гүлшара Әбдіқалықова телевизиялық форматта балаларға тілек білдіріп, жаңа жыл мерекесімен құттықтады. Ал, облыс әкімінің орынбасары, қала, аудан әкімдері көпбалалы отбасынан шыққан дарынды, озат оқушыларға жаңажылдық сыйлықтарды үйлестіріп, мерекелік көңіл-күй сыйлады.

Президент атынан ұсынылған сыйлықта bilim book кешені, 6 айға тегін интернет роутер мен естелік кітаптар және тәтті сыйлықтар бар.

5
Фото: Қызылорда облысының әкімдігі

Мақаланың түпнұсқасы: https://kaz.nur.kz/society/1948480-qyzylordada-syrsa-zagu-rasiminde-algasqy-ulpa-qar-zaudy/