Алматы әкімінің орынбасары "омикрон" штамы кімдер үшін қауіпті екенін айтты

Алматы қаласы әкімінің орынбасары Ержан Бабақұмаров коронавирус бойынша болжам жасады деп хабарлайды KAZ.NUR.KZ тілшісі.

"Қала үш бағытқа дайындалып жатыр. Бірінші – АМСК (алғашқы медициналық-санитарлық көмек). Бізде 1200 бөлім мен 600-ден астам мобильді дәрігерлер тобы бар. Қазір мобильді топтарды ресурстық қамтамасыз ету жүріп жатыр. Үй стационарында жүргендер үшін телемедицина орталығы қосылады", – деді әкім орынбасары.

Сондай-ақ, ол Қазақстанда "омикрон" штамы жастарға көбірек әсер ететінін хабарлады.

"Үлкен қатер төнеді деп ойлаймын. Жас буынның арасындағы вакцинация деңгейі өте төмен", – деді Бабақұмаров.

Сонымен қатар, әкім орынбасары қазір Алматыда КВИ жұқтыру қарқынына байланысты жоспар қаралып жатқанын хабарлады.

"Бізде инфекциялық емес станцияларды инфекциялық станцияға айналдыру жоспары бар. Қаладағы індетті жұқтырғандардың шамамен 30-40 пайызы ауруханада емделу керек деп есептейміз. Ауруханада жатқандардың шамамен 10 пайызы "ауыр" науқастар болады. Жансақтау бөлімдерін, реанимациялық төсектерді дайындадық, жетіспейтін жерді кеңейтеміз", – деп түсіндірді шенеунік.