RU

"Қанша зат қирап қалды": Жетісайлық кәсіпкер Алматыда зардап шеккен бизнесмендерге 500 млн теңге аударды

Тәртіпсіздіктен кейінгі Алматы
Тәртіпсіздіктен кейінгі Алматы: Владимир Третьяков, NUR.KZ

Қазақстандық меценат Бахаридин Аблазимов бүлік кезінде зардап шеккен кәсіпкерлерді қолдап, 500 млн теңге көмек көрсетеді. Қаржы кәсіпкерлік субъектілерін қалпына келтіру үшін құрылған "Күшіміз бірлікте" қорына аударылады. Бұл – қорға түсетін алғашқы қомақты қаржы деп хабарлайды "Атамекен" арнасы.

Бахаридин Аблазимов қайғылы оқиға кезінде қайтыс болған әскерилер мен отандастарымыздың отбасы мен жақындарына көңіл айтты.

Кәсіпкер өзінің анасы жас кезінде жалғыз қалып, 10 баланы қиындықпен өсіргенін атап өтті. Ол ОҚО (қазіргі Түркістан облысы – авт.) Жетісай ауданы Красная звезда совхозында дүниеге келіп, өзі 13 жасында әкесі дүниеден өткенін айтты.

"Анамыз он баламен жалғыз өзі қалып, Жетісай қаласының нан зауытында күндіз еденін жуып, кешке қарауыл болып, бәрімізге білім беріп, тәрбие беріп, өсірді. Анамыз бізді жастайымыздан бауырламырымызбен бірге болыңдар, бірлік бар жерде ынтымақ бар, ырыс бар деп қазақ айтқандай, соның арқасында Аллаға шүкір, осындай дәрежеге жеттім", – деді ол.

Бахаридин Аблазимов "Күшіміз бірлікте" қорына ұжымының атынан 500 млн теңге аударып, зардап шеккен кәсіпкерлерге қолдау білдіретінін жеткізді.

"Алматыда қираған, өртенген шағын кәсіпкерлердің асханалары, дүкендері, шаштараздарын көріп, жүрегіміз ауырды. Қанша заттар қирады, бүкіл Қазақстанда қирап жатыр. Соған енді қор ашылды деп естуіммен өзімнің азаматтық борышым деп санап, өзімнің атымнан, өзімнің ұжымымның атынан 500 млн теңге қаржылай көмегімді білдіргім келіп отыр", – деді ол.

Сондай-ақ, ол еліміздің ірі кәсіпкерлерін шағын және орта бизнестегі азаматтарымызды қолдауға және ел болып бірігіп, қазақ халқын жақсы жағынан көрсетуге шақырды.

«Біздің елімізде жүрегі кең азаматтар, кәсіпкерлер көп. Солардың бәрін бірлесіп, елімізді бейбіт өмірге келуіне тек Мемлекет басшысына, мемлекетке ілмей біз де ел болып бірігіп, елді қалпына келтіруге шақырамын. Бірігейік, ел болайық, бір тудың астына жиналайық. Біздің күшіміз бірлікте", – деп түйіндеді сөзін Бахаридин Аблазимов.

Айта кетейік, бұған дейін Алматы кәсіпкерлер палатасы өңірлік кеңесінің төрағасы Максим Барышев "Күшіміз бірлікте" – "Сила в единстве" қорын құратынын мәлімдеген болатын. Қорға түскен қаражат Алматы қаласы және басқа да аймақта зардап шеккен кәсіпкерлерге арнайы комиссияның шешімінен кейін бөлінеді.

Мақаланың түпнұсқасы: https://kaz.nur.kz/society/1950386-qansa-zat-qirap-qaldy-zetisailyq-kasipker-almatyda-zardap-sekken-biznesmenderge-500-mln-tenge-audardy/