Ақтөбе тұрғыны бананға телефон жасырып, қамаудағы танысына бермек болған

Ақтөбеде ҚАЖ департаментіне қарасты КА-168/1 (тергеу изоляторы) мекемесінің режим және күзет бөлімінің қызметкерлері мекемеге келген сәлемдемені тексеру кезінде бананның ішіне мұқият жасырылған ұялы телефон және Beeline SIM-картасын тәркіледі деп хабарлайды Polisia.kz.

Тыйым салынған заттарды 29 жастағы У. И. есімді қала тұрғыны абақтыда "жалған кәсіппен айналысты" деген айыппен отырған күдікті-айыпталушы танысына бананның ішіне жасырып, бермек болған.

"Азамат У. И. өз түсініктемесінде кінәсін толық мойындады. Құқық бұзушыға ӘҚБтК-нің 791 және 795-баптары бойынша хаттама толтырылып, іс Ақтөбе қаласының мамандандырылған әкімшілік сотына жолданды", – дейді Ақтөбе облысы бойынша ҚАЖ департаментінің бастығы Руслан Уразбаев.