Коронавирус: "Қызыл" аймақтағы облыстар саны 8-ге дейін қысқарды

Елдегі эпидемиологиялық ахуалды бағалау матрицасы жаңарды. Оған сәйкес, Шығыс Қазақстан облысы "қызыл" аймақтан "сары" аймаққа өтті, деп хабарлайды COVID-19-дың таралуына жол бермеу жөніндегі ВАК Telegram каналында.

10 ақпандағы жағдай бойынша Қазақстан өңірлеріндегі эпидемиологиялық ахуалды бағалау матрицасы келесідей:

• "қызыл" аймақта: Нұр-Сұлтан, Алматы қалалары мен Ақмола, Батыс Қазақстан, Қарағанды, Қостанай, Павлодар, Солтүстік Қазақстан облыстары;
• "сары" аймақта Алматы, Ақтөбе, Атырау, Шығыс Қазақстан облыстары;
• "жасыл" аймақта Шымкент қаласы, Жамбыл, Қызылорда, Маңғыстау, Түркістан облыстары тұр.

Айта кетсек, өткен тәулікте елімізде коронавирус жұқтырған 3 329 адам тіркелген еді. Жалпы ел бойынша COVID-19 инфекциясын жұқтырғандар саны 1 283 171-ге жетіп отыр.

Соңғы мәлімет бойынша 73 160 адам коронавирус инфекциясынан емделуде, оның ішінде 8 509 пациент стационарда, 64 561 науқас амбулаториялық деңгейде ем қабылдауда.

Жалпы, 387 адамның жағдайы ауыр, 157 пациенттің жағдайы өте ауыр деп бағалануда. Тағы 101 науқас өкпені жасанды желдету аппаратында жатыр.