Коронавирус: Нұр-Сұлтан қаласы мен Қарағанды облысы "қызыл" аймақтан шықты

Елдегі эпидемиологиялық ахуалды бағалау матрицасы жаңарды. Оған сәйкес, Нұр-Сұлтан қаласы мен Қарағанды облысы "қызыл" аймақтан "сары" аймаққа өтті, деп хабарлайды COVID-19-дың таралуына жол бермеу жөніндегі ВАК Telegram каналында.

16 ақпандағы жағдай бойынша Қазақстан өңірлеріндегі эпидемиологиялық ахуалды бағалау матрицасы келесідей:

• "қызыл" аймақта Алматы қаласы мен Ақмола, Қостанай, Павлодар, Солтүстік Қазақстан облыстары;
• "сары" аймақта Нұр-Сұлтан қаласы, Алматы, Батыс Қазақстан, Қарағанды, Шығыс Қазақстан облыстары;
• "жасыл" аймақта Шымкент қаласы, Ақтөбе, Атырау, Жамбыл, Қызылорда, Маңғыстау, Түркістан облыстары тұр.

Айта кетсек, өткен тәулікте елімізде 1508 адамнан коронавирус инфекциясы анықталған еді.

Осылайша, жалпы ел бойынша коронавиру жұқтырғандар саны 1 293 901-ге жетіп отыр.

Соңғы мәлімет бойынша, елімізде 45 328 адам коронавирус инфекциясынан емделуде, оның ішінде 6 191 пациент стационарда, 39 137 науқас амбулаториялық деңгейде ем қабылдауда.

Жалпы, 308 адамның жағдайы ауыр, 133 пациенттің жағдайы өте ауыр деп бағалануда. Тағы 101 науқас өкпені жасанды желдету аппаратында жатыр.