Жамбыл облысында шаң басқан жертөле қалай жастар орталығына айналды

Опубликовано:

жастар орталығы
Фото: qazaqtoday

Жамбыл облысының Меркі аудандық ауруханасында шаң басып тұрған жертөле жастар орталығына айналды. Заманауи орталықты ашуға ауданда психологиялық және моральдық көмекке зәру жастардың көптігі себеп болған, деп хабарлайды KAZ.NUR.KZ тілшісі.

Өңірдегі келеңсіздіктен, өмірдегі қиындықтан қажыған жастар мұнда үстел теннисі және өзге де спорт түрлерімен шұғылданып, дәрігер көмегін тегін алады.

Сондай-ақ, дұрыс тамақтануға көңіл бөліп, өмірдегі өзге де зиянды заттардан аулақ жүруге машықтанады.

спорт зал
Фото: qazaqtoday

14 пен 29 жас аралығындағы жастардың кез келген уақытта келіп, моральдық тұрғыдан демалуына, өмірлік проблемаларын шешуіне мүмкіндік қарастырылған.

«Менің қолымдағы құмыраның ішінде құрсақтағы сәби бейнеленген. Түтікше арқылы темекі түтіні жіберілгенде іштегі сәбидің қалай уланып, қиналатынын көзбен көруге болады. Стакандардың ішіне әртүрлі спирттік ішімдіктерді белгілеп қойдық. Қызыл лентаны тартып, арнайы аппараттағы көзілдірікті жастарға кигіземіз. Көзілдірікті кигенде адам ішімдік ішкендей күйге түсіп, өзін өзі басқара алмайды. Масаң күйдегідей көзі қарауытып, басы айналады, аяғы теңселеді. Осы бөлмедегі өзге де заттар арқылы жасөспірімдерді қоғамдағы түрлі қауіптерден, қылмыстан сақтандырсақ деген ойымыз бар», – деді орталықтың дәрігері Зәуре Мұхамбетова.
сурет
Фото: qazaqtoday

Бір қызығы, жастар орталығының ғимараты ретінде аурухананың жертөлесі таңдап алынған. Бас дәрігер бос тұрған жертөле бөлмелерін жастар бас қосатын орталыққа айналдыруды жөн көрген. Осылайша, шаң басып тұрған жертөле қолданысқа енді.

Мақаланың түпнұсқасы: https://kaz.nur.kz/society/1958975-zambyl-oblysynda-san-basqan-zertole-qalai-zastar-ortalygyna-ainaldy/