Қателесіп ақшам намазының азанынан бұрын ауыз ашып қойса ораза бұзыла ма

Бір дауысты естіп оны ақшам намазының азаны деп ойлап ауыз ашып қойса, содан кейін азан шақырылса, оның үкімі қалай? Ораза бұзыла ма? Бұл сауалдарға ҚМДБ-ның fatua.kz сайты жауап берді.

"Оразаның уақыты белгілі. Алайда уақыты кірмей ішіп-жеп қойып, артыннан уақыт кірмегенін білсе ары қарай ештеңе жеместен (оразаны-ред.) жалғастырады", - дейді Қазақстан мұсылмандар діни басқармасынан.

Осы орайда ҚМДБ имам әл-Бұхариден жеткен хадисті мысал етті.

Әбу Бәкрдың қызы Әсмә (ол екеуіне Алла разы болсын) былай дейді:

"Біз Пайғамбарымыздың (оған Алланың салауаты мен сәлемі болсын) тірі кезінде Рамазан айында бұлтты күні ауыз ашқан едік, содан соң күн шықты. Әбу Усама мен Һишамға айттым: Сол күннің қазасын өтеуге бұйырылды ма дегенімде, иә, ол күннің қазасын ұстап беруі міндетті, деді", - дейді ол.

Айта кетейік, биыл Рамазан айы 2 сәуірде басталып, 1 мамырда аяқталады. Ораза 30 күн болмақ. 

• 2 мамыр – Ораза айт күні.
• 27 сәуірден 28 сәуірге қараған түн – Қадір түні.

Биылғы пітір садақаның мөлшері – 500 теңге.

Ал қалалар бойынша Рамазан айындағы ораза мен намаз кестесін сілтеме арқылы өтіп, көре аласыз.