Алматыда 19 жастағы студент есірткі жеткізетін курьер болып табыс тауып келген

Опубликовано:

Кісен
Көрнекі фото: pixabay.com

Алматыда есірткі тасушы курьер болып жұмыс істеген 19 жастағы студент ұсталды. Оны полиция қызметкерлері мен есірткі қылмысымен күресушілер оқиға орнында ұстады, деп хабарлайды ҚазАқпарат.

Қаладағы жоғары оқу орындарының бірінің 3-курс студенті екі ай бойы есірткі тасушы курьер болып жұмыс істеген.

Күніне орта есеппен 20-25 есірткі жеткізіп келген.

Жас жігіт телеграм чатта орындалған жұмысын баяндап, сурет пен геолокацияны көрсетіп отырған.

Әр есірткіні жеткізгені үшін жұмыс берушіден 1 мың 200 теңге алған.

«Есірткі сатушы «Қайрат» ықшамауданындағы жеке үйлердің бірінің маңында жедел және арнайы іс-шаралар барысында ұсталды. Тінту кезінде одан Меф 1,0*10 және Меф 0,5*15 деген жазуы бар полиэтилен бума табылып, тәркіленді. Буманың ішінде ашық-қоңыр түсті ұнтақ затымен 25 полиэтилен бума бар. Аталған дерек тіркеліп, Қылмыстық кодекстің 297-бабы 1-бөлігі бойынша тергеліп жатыр», – деді Алматы қалалық полиция департаментінің есірткі қылмысына қарсы күрес басқармасының бастығы Сағындық Аяғанов.

Еске сала кетейік, бұған дейін Алматыда синтетикалық есірткіні өндіруге арналған шикізаттың ірі көлемі тәркіленгенін жазғанбыз.

Мақаланың түпнұсқасы: https://kaz.nur.kz/society/1963209-almatyda-19-zastagy-student-esirtki-zetkizetin-kurer-bolyp-tabys-tauyp-kelgen/