Елордада 88 жастағы қарияны тонап кетті

Криминалдық полиция қызметкерлері жедел-іздестіру іс-шараларын жүргізу кезінде кісі тонады деген күдікпен ер адамды ұстады, деп хабарлайды Sputnik Қазақстан.

Полицияға 88 жастағы қарт кісі хабарласып белгісіз азамат түнгі уақытта оның есігін қағып, ашқан сәтінде соққыға жығылғаны жөнінде арызданған.

Қарақшы қарияға шабуыл жасап, оның қолынан алтын сақинасын шешіп алған. Мұнысымен қоймай күдікті бөлмеге кіріп тағы бір алтын сақина тауы, оны да қолды еткен.

Тергеу барысында, қаскүнем Затаевич көшесінде бір тәулікке пәтер жалдап тұрғаны анықталды. Қарама-қарсы пәтерде қарт кісі жалғыз тұратынын біліп, оған шабуылдаған.

Елорда полицейлері 28 жастағы күдіктіні ұстады. Ол алтын бұйымдарды ломбардқа өткізіп жіберген.

Қылмыскер бұрын ұрлық жасағаны үшін сотталғаны мәлім болды. Ұсталған азамат Нұр-Сұлтан қаласы ПД уақытша ұстау изоляторына қамалды.

"Сарыарқа" ауданы полиция басқармасының бастығы Қуаныш Орынбетов "Нұр-Сұлтан қаласының полицейлері азаматтарға, әсіресе қарт адамдарға үйде болған сәтте есікті іштен бекітуді ұмытпаңыз, бейтаныс адамдарға сенбеңіз", - дейді.