Биыл соңғы қоңырау мен аттестат тапсыру рәсімі қалай өтеді: Министрлік жауап берді

Биыл елімізде соңғы қоңырау мен аттестат тапсыру салтанаты офлайн форматта өтеді. Бұл туралы сенат отырысында Білім және ғылым министрінің орынбасары Шолпан Каринова айтты, деп хабарлайды KAZ.NUR.KZ тілшісі.

Вице-министрдің сөзінше, оқу жылының соңында дәстүрлі екі іс-шара өтеді. Олар - соңғы қоңырау мен бітіруші сыныптарға қорытынды аттестаттаудан өткеннен кейін жалпы орта білім туралы аттестатты салтанатты тапсыру рәсімі.

"Бұл екі іс-шара дәстүрлі түрде өткен жылдардағыдай белгіленген мерзімде өтеді. Биыл соңғы қоңырау 25 мамырда болады. Әр мектеп бұл шараны өз бетінше өткізеді. Аттестатты салтанатты түрде тапсыру рәсімі – балалардың өміріндегі алғашқы маңызды құжат алатын күн, сондықтан бұл шара да өтеді", - дейді ол.

Шолпан Каринова қазіргі уақытта Білім және ғылым министрлігі бұл іс-шараларды өткізу форматы бойынша ұсыныстар әзірлеп жатқанын атап өтті.

"Оқу жылының аяқталуына әлі бір жарым ай уақыт бар. Біз аталған ұсыныстарды дайындап, әріптестеріміз бен БАҚ өкілдеріне хабарлайтын боламыз. Бұл жыл сайын өтетін іс-шара. Тек соңғы жылдары коронавирус пандемиясына байланысты шектеулер болды.

Сондықтан іс-шараларды офлайн форматта өткізе алмадық. Биыл сертификаттарды салтанатты түрде тапсыру рәсімі міндетті түрде білім беру ұйымдарында өтеді. Қосымша ұсыныстарды да хабарлайтын боламыз", - дейді Шолпан Каринова.