Бас прокуратура қаржы пирамидасы ісі бойынша Мейіржан Төребаев неліктен қамауға алынбағанын түсіндірді

Орталық коммуникациялар қызметінде өткен брифингте Бас прокуратура өкілдері блогер Мейіржан Төребаевтың қаржы пирамидасы ісі бойынша тергеу мерзімінде неліктен қамауға алынбай, кепілмен босатылғанын түсіндірді, деп хабарлайды KAZ.NUR.KZ тілшісі.

"Барлық мән-жайлар ескеріледі - тұрғылықты жері бойынша тұрақты тіркелуі, кәмелетке толмаған балаларының болу-болмауы, қылмыс жасаудағы рөлі.

Осы жайттарды ескере отырып, сот оған қатысты кепіл түріндегі бұлтартпау шарасын тағайындады. Адамның қамауға алынбауы оның қылмыстық жауапкершілікке тартылмайтынын білдірмейді", - деді Бас прокурордың орынбасары Әсет Чиндалиев.

Еске сала кетсек, бұған дейін Ішкі істер министрлігі де қаржы пирамидасына қатысты қылмыстық іс бойынша қазақстандық блогерлердің неліктен ұсталмағанын түсіндірген болатын.

Сондай-ақ, блогерлер күдікті ретінде саналған қаржы пирамидасы ісі бойынша тергеу жақын арада аяқталатыны, кейін ол сотқа жолданатыны белгілі болды.