Елімізде 1-сыныптан бастап "Еңбекке баулу" пәні қайта енгізіледі

Сенатта өткен парламенттік тыңдауда премьер-министрдің орынбасары Ералы Тоғжанов елімізде 1-сыныптан бастап "Еңбекке баулу" пәні қайта енгізілетінін мәлімдеді, деп хабарлайды Baq.kz.

"Еңбекке баулудың ұрпақ тәрбиесіндегі маңызы зор екені белгілі. Сол себепті жаңа оқу жылында 1-сыныптан бастап "Еңбекке баулу" пәні қайта енгізіледі", - дейді Ералы Тоғжанов.

Айтуынша, жоба ретінде мектептер жанында жылыжайлар ашу қолға алынады. Бүгіннің өзінде 7 пайызға жуық мектепте бұл тәжірибе бар.

"Сонымен қатар алғаш рет биылдан бастап мектептерде 7-сыныптан бастап болашақ мамандықты таңдауға бағыттайтын "педагог - кәсіптік бағдар беруші" маманы енгізіледі", - деп толықтырды вице-премьер.

Еске салайық, бұған дейін білім және ғылым министрі Асхат Аймағамбетов келесі оқу жылынан бастап "өзін-өзі тану" пәні қалай оқытылатынын түсіндірген еді.