Қызылорда тұрғынына кірпішпен шабуыл жасаған екі адам ұсталды

Қызылордада көшеде қала тұрғынына кірпішпен шабуыл жасаған екі адам ұсталды, деп хабарлайды Polisia.kz.

Басылым дерегінше, оқиға 15 маусым күні түнгі сағат 02:00 шамасында болған. Қала тұрғынын белгісіз екі азамат кірпішпен ұрып-соғып жатқаны Қызылорда қалалық ПБ Жедел басқару орталығының бейнебақылау камерасына түскен.

"Қала аумағындағы қылмыс орнына патрульдік полиция аттанды. Жедел-тергеу тобы онда 43 және 37 жастағы масаң күйдегі азаматтарды ұстады", - делінген хабарламада.

Қазіргі уақытта аталған дерек бойынша Қылмыстық кодекстің 107-бабын 2-бөлігі (Денсаулыққа қасақана ауырлығы орташа зиян келтiру) бойынша сотқа дейінгі тергеп-тексеру жұмыстары жүргізілуде.

Күдіктілерге қатысты ешқайда кетпеу туралы қолхат түрінде бұлтартпау шарасы таңдалды. Полицейлер оқиғаның мән-жайларын анықтауда.