Түркістан облысында флягаға кіріп, шыға алмай қалған 7 жасар қыз құтқарылды (видео)

Түркістан облысында 7 жасар қыз су толтыратын флягаға кіріп, қайта шыға алмай қалған. Баланың ата-анасы құтқарушылардың көмегіне жүгінуге мәжбүр болды, деп хабарлайды өңірлік ТДЖ Instagram-дағы ресми парақшасында.

Ведомствоның мәліметінше, келеңсіз жағдай Жетісай ауданы, Атакент ауылындағы үйлердің бірінде болған.

Ата-анасының қарауынсыз қалған қыз бала су толтыруға арналған алюминий флягаға кіріп, кептеліп қалған.

Баласын флягадан өздігінен шығара алмаған ата-ана құтқарушыларды шақырған.

"Авариялық-құтқару жұмыстарына Түркістан облыстық төтенше жағдайлар департаментінің 4 қызметкері жұмылдырылды. Құтқарушылар арнайы құрылғымен фляганы кесіп, баланы ата-анасына тапсырды", - дейді өңірлік ТДЖ-дан.

Ведомство қыз баланың ешқандай жарақат алмағанын атап өтті.

Сондай-ақ құтқарушылар ата-аналар мен ересектерді балаларды қараусыз қалдырмауға шақырды.

Еске сала кетейік, бұған дейін Шығыс Қазақстан облысында құтқарушылар флягаға кіріп, кептеліп қалған кішкентай баланы құтқарған еді.

Мақаланың түпнұсқасы: https://kaz.nur.kz/society/1975923-turkistan-oblysynda-su-toltyratyn-ydysqa-kirip-syga-almai-qalgan-7-zasar-qyz-qutqaryldy-video/