Алматы тауларында адасып кеткен ағылшын азаматы табылды

Алматы тауларында адасып кеткен Ұлыбритания азаматы табылды, деп хабарлайды Қазақпарат.

Алматы қаласының құтқару қызметінің мәліметінше, 9 тамыз күні сағат 21:08-де төтенше жағдайлар департаментінен "Чимбулачка" шыңынан түсіп бара жатқан кезінде 1979 жылы туған Ұлыбританиялық Макогон Романның адасып кеткені туралы хабарлама түскен.

"Іздестіру жұмысына "Тұйық су" лагерінен экипаж жолға шығады. Сағат 22:44-те құтқарушылар адасқан адаммен визуалды байланыс орнатқан (ол таудың арғы жағында болды). Екі жақ кездесу орнына дейін қозғалысты жалғастырған. Сағат 00:30-да құтқарушылар адасып кеткен адаммен кездесіп, төменге түсе бастайды.

Сағат 02:45-те олар "Шымбұлақ" тау-шаңғы курортына келеді. Мұнда ағылшын азаматын әйелі күтіп алды. Сондай-ақ оған медициналық көмек қажет болған жоқ",- делінген хабарламада.

Еске сала кетейік, бұған дейін 44 жастағы Ұлыбритания азаматы Роман Макогон Алматы тауларында адасып кеткенін жазған едік.