"Ұлы дала жорығы": Елімізде тұңғыш рет 12 күндік аламан бәйге ұйымдастырылмақ (видео)

Елімізде тұңғыш рет қашықтығы 1200 шақырымнан асатын "Ұлы дала жорығы" атты 12 күндік аламан жарыс, марафон-бәйге ұйымдастырылмақ. Бұл туралы Мәдениет және спорт министрі Дәурен Абаев өзінің Facebook парақшасында мәлім етті.

Ведомство басшысы жаңа жобаны видеоүндеу арқылы көпшілікке таныстырды.

"Елімізде тұңғыш рет қашықтығы 1200 шақырымнан асатын "Ұлы дала жорығы" атты 12 күндік аламан жарыс, марафон-бәйге жобасын қолға алдық. Бұл бәйге болашақта өзіміздің ат үстіндегі дәстүрлі "Париж Дакарымыз немесе Тур де Франсымыз" болады деп үміттенемін. Жігіттеріміз жігерін сынайтын, қазанаттарымыз қажыр-күшін көрсететін марафон-бәйгеге барлығыңызды жанкүйер болуға шақырамын", - делінген министрдің жазбасында жаңа жоба жайлы.

Марафоншылар мәреге 12 күн ішінде жетуге тиіс.

Доданың толық шартын бейнеүндеуден немесе qazanat.com сайты арқылы білуге болады.