Қазір жемістерге жасырын түрде вакциналар қосылып жатқаны рас па

Әлеуметтік желілерде тараған видеода 2000 жылы егілуге қарсы шыққандарды егу үшін жеміске жасырын түрде вакциналар қоса бастағаны туралы айтылады. Stopfake.kz басылымы бұл ақпараттың қаншалықты шындыққа жанасатынын анықтап көрді.

Басылым мәліметінше, желідегі роликте The Guardian порталындағы мақаланың скриншоты көрсетілген, оның тақырыбын "Гендік-модификацияланған жемістердегі вакцина В гепатитін жоя алады" деп аударуға болады. Мұндай мақала шынымен де бар. Ол 2000 жылдың 8 қыркүйегінде жарық көрді және ол нақты препарат емес, сынақтар туралы.

Сондай-ақ, мәтінде жеуге болатын вакциналар 1990 жылдары әзірлене бастағаны туралы айтылады. Идея иммундық реакцияны тудыруы және белгілі бір ауруға қарсы вакцина ретінде әрекет етуі мүмкін гендік-модификацияланған өсімдік немесе жануар өнімдерін жасауға негізделген.

Дегенмен, сипаттаманың қарапайымдылығына қарамастан, мұндай вакциналарды жасау өте қиын. Бүгінде, осы салада зерттеулер басталғаннан кейін 30 жыл өткен соң, әлемде тырысқақ, қызылша, энтеровирустық везикулярлы стоматит және В, С және Е гепатиттеріне қарсы жеуге болатын вакциналар бар.

Олардың барлығы әртүрлі сынақ кезеңдерінде, ал кейбіреулері әлі күнге дейін адамдарда сыналмаған – тек зертханалық жануарларда ғана. Жеуге болатын вакциналардың ешқайсысы әлі нарыққа шығарылған жоқ және оны алу мүмкін емес. Сонымен қатар, гепатиттен қорғайтын алма немесе банан сатып ала алмайсыз.

Демек, тараған ақпарат – манипуляция. Жеуге жарамды вакциналар бүгінгі күнге дейін әзірленуде. Олардың көмегімен қашан, неден және қалай егілуге болатыны белгісіз. Қазіргі кезде дүкендер мен базарларда сатылатын жемісте вакциналар жоқ.