Жексенбіде Қазақстанның үш мегаполисі мен ел аумағында ауа райы қандай болады

"Қазгидромет" РМК 30 қазан жексенбіге арналған ауа райы болжамын ұсынды, деп хабарлайды KAZ.NUR.KZ.

Синоптиктердің болжамынша, бүгін еліміздің басым бөлігінде атмосфералық фронттардың әсерінен тұрақсыз ауа райы сақталады.

Кей жерлерде жауын-шашын, оңтүстікте, оңтүстік-шығыста қатты жауын-шашын (жаңбыр, қар), республика бойынша тұман, көктайғақ, желдің күшейуі күтіледі.

Тек Ақмола, Солтүстік Қазақстан, Шығыс Қазақстан облыстарында солтүстік-батыс антициклонының әсерінен жауын-шашынсыз ауа райы сақталады.

Сондай-ақ метеорологтар бүгін Қазақстанның үш мегаполисінде ауа райы қандай болатынын болжады.

Мамандардың мәліметінше, жексенбіде Астанада көшпелі бұлт шығып, күндіз аздаған жауын-шашын (жаңбыр, қар) жауады. Сонымен қатар оңтүстік-шығыстан екпіні 2-7 м/с болатын жел соғады. Түнде 4-6 градус аяз, күндіз 2-4 градус жылы болады.

Алматы қаласында да көшпелі бұлт шығып, күннің екінші жартысында жаңбыр жауып, екпіні 3-8 м/с болатын жел тұрады. Түнде 4-6, күндіз 13-15 градус жылы болмақ.

Шымкентте де бүгін көшпелі бұлт шығып, таңертең және күндіз кей уақытта жаңбыр жауады. Одан бөлек батыстан екпіні 8-13 м/с болатын жел соғады, таңертең және күндіз екпіні 15-20 м/с-қа дейін жетуі ықтимал. Түнде 6-8, күндіз 10-12 градус жылы болады.