Top.Mail.Ru

Сайт нұсқасы

ru kz

Зектілері

"Сіздермен жұмыс істеу мен үшін үлкен мәртебе": Астананың жаңа әкімі қала тұрғындарына үндеу жолдады

Опубликовано:

Жеңіс Қасымбек
Жеңіс Қасымбек. Фото: Қарағанды облысы әкімдігінің ресми сайты

Астананың жаңа әкімі Жеңіс Қасымбек өзінің Instagram парақшасында қала тұрғындарына үндеу жолдады, деп хабарлайды KAZ.NUR.KZ тілшісі.

Жеңіс Қасымбек өзінің Instagram парақшасында елорданың одан ары көркейіп, тұрғындарға өмір сүруге қолайлы ету үшін, барлық жағдайды жасайтынын атап өткен.

"Құрметті астаналықтар! Сіздермен жұмыс істеу – мен үшін үлкен мәртебе әрі үлкен жауапкершілік. Елордамызды ары қарай бірлесе дамытатын боламыз. Астана – қашанда өзіне еріксіз баурап алатын, тартымды қала болып келеді. Сол сияқты Астананың өзіне тән сұлулығы мен өзіндік ерекше энергиясы бар. Қаламызды одан әрі жайлы да қолайлы ету үшін жұдырықтай жұмылып еңбек етеміз.

Қазіргі уақытта дүние жүзіндегі мегаполистердің алдында жаңа жаһандық сын-қатерлер мен міндеттер тұр. Астана да солардың қатарында. Экономикалық көрсеткіштер, кәсіпкерлікті дамыту, инфрақұрылым, қолжетімді әлеуметтік қызметтер – өз жұмысымызда қала өмірі үшін маңызы зор барлық саланы қамтимыз", - деп жазды қала әкімі өзінің желідегі парақшасында.

Сонымен бірге шаһар басшысы елордада қолжетімді баспаналар мен әлеуметтік нысандар салу жұмысы одан ары жалғасатынын айтқан.

"Қала тұрғындарының жайлы өмір сүруі үшін қолжетімді әлеуметтік тұрғын үйлер, мектептер, балабақшалар, медициналық нысандар және т.б. салуды әрі қарай да жалғастырамыз. Қала тұрғындарының саны, құрылыс көлемі жыл сайын өсіп келе жатқанын ескеріп, жылу, су және электрмен жабдықтау нысандарының қуатын ұлғайту бойынша жұмыс істейтін боламыз.

Әлеуметтік желі – тиімді байланыс құралы. Біз үшін сіздердің пікірлеріңіз маңызды. Елордамызды ары қарай дамыту бойынша сіздерден ұсыныстар мен идеялар күтеміз"-деп жазды Жеңіс Қасымбек.

Айта кетейік, күні кеше Жеңіс Қасымбек Астана қаласы әкімінің қызметіне тағайындалған болатын.

Бұған дейін ол Қарағанды облысының әкімі қызметін атқарған еді.

Мақаланың түпнұсқасы: https://kaz.nur.kz/society/2000947-sizdermen-zumys-isteu-men-usin-ulken-martebe-astananyn-zana-akimi-qala-turgyndaryna-undeu-zoldady/