"Адам тұратындай жағдайға келеді": Екібастұздағы апаттан 50-ге жуық пәтер зақымдалған

Екібастұзда апат салдарынан барлығы зақымдалған 50 шақты пәтер анықталды. Дүйсенбіден бастап үйлерді ретке келтіру үшін бригадалар жұмысқа кіріседі, деп хабарлайды Pavlodarnews.kz.

"Әкімдік қызметкерлерімен бірге пәтерлерді аралап шықтық. Апат салдарынан барлығы зақымдалған елу шақты пәтер анықталды. Бұл үйлерге дүйсенбіден бастап бригадалар кіріп, адам тұратындай жағдайға келтіреді. Қалған өтініштер топтастырылғаннан кейін жұмыс басталады. Егер де комиссия тұрмыстық техника апат салдарынан істен шыққанын растаса, шығынның өтелетіндігіне үміт артуға болады", — деді "ОАЭК" АҚ басқарма төрағасының орынбасары Леонид Янушко баспасөз конференциясында.

Екібастұз қаласының әкімі Аян Бейсекиннің айтуынша, барлық зардап шеккен пәтерлер бойынша жеке тізім жасалуда. Ол үшін арнайы өтініштерді қабылдайтын жеті мекенжай бойынша пункті ашылған. Бұдан бөлек, әкімшілікте зардап шеккен азаматтардың шағымдарын қабылдайтын пункті бар.

"Бұл мәселеге қатысты "ОАЭК" АҚ басшылығымен келіссөздер жүргізілген. Сондықтан да жалған ақпарат болмауы тиіс. Міндетті түрде жөндеу жұмыстары жүргізіледі. Ақауларды анықтайтын 70 адамнан тұратын жеті бригада құрылған. Тұрғындардың өздері жөндеуді бастаған жағдайлар да бар. Ол үшін чектерді ұсыну қажет. Мұндай жағдайда комисия тексергеннен кейін шығын өтеледі", — деді Аян Бейсекин.

Естеріңізге сала кетейік, бұған дейін тұрғындарға электр энергиясы бойынша шығындарды өтеу үшін өтініш жазудың қажеті жоқ екені айтылған болатын.