ҰҚК: Құқық қорғау органдарының қызметкерлері қаруды қайта айналымға шығарып сатқан (видео)

Опубликовано:

Тәркіленген қару
Тәркіленген қару. Фото: ҰҚК

Қару-жарақты екінші рет айналымға енгізумен шұғылданған құқық қорғау органдарының қызметкерлері мен бұрынғы қызметкерлері және олардың көмекшілеріне қатысты сот процессі аяқталды, деп хабарлайды ҰҚК ресми сайты.

ҰҚК баспасөз қызметінің хабарлауынша, тіркеуден шығарылған оқ-дәрімен атылатын қару және оқ-дәрі қылмыстық схема бойынша жойылды деген жалған есеп арқылы кейін сатылуға шығарылып отырған.

"Ұлттық қауіпсіздік комитеті ІІМ Өзіндік қауіпсіздік департаментімен бірге екі кезеңнен тұратын операция барысында Алматы қаласы және Алматы, Павлодар, Солтүстік Қазақстан мен Қарағанды облыстарында қаруды қайта айналымға шығару арнасының жолын кесті.

Құрықтау және тінту барысында 347 бірлік қару, 13 граната және 7 387 оқ-дәрі алынды", – делінген хабарламада.

Ведомство мәліметінше, полицияның бұрынғы қызметкері ұйымдастырған қаруды модификациялау цехының көзі жойылды.

Жедел зерделеуді жалғастыру арқылы Ұлттық қауіпсіздік комитеті қылмыс әлеміне, діни ағымдарға қатысты және бұрынғы полицейлерден тұратын қаруды сатып алушылардың толық базасын анықтаған.

"Алматы қаласы Алмалы аудандық сотының шешімімен кінәлі адамдар 2-ден 5 жылға дейінгі бас бостандығынан айыру мерзімдеріне сотталды.

Қызметтік міндеттеріне салғырт қарағандары және жеке құрамды бақылауды әлсіреткендері үшін құқық қорғау органдарының бірқатар басшылары теріс негіз бойынша қызметтен шығарылды", – дейді комитет өкілдері.

Құзырлы органның хабарлауынша, қолданылған шаралар қару айналымын бақылау саласындағы заңдылықты сақтауға және қылмысқа бой бермеу бағытына оң әсерін тигізді.

Мақаланың түпнұсқасы: https://kaz.nur.kz/society/2005457-uqk-quqyq-qorgau-organdarynyn-qyzmetkerleri-qarudy-qaita-ainalymga-sygaryp-satqan-video/