Бас прокурор елордалық балабақшада ерекше қажеттілігі бар баланы қорлау ісіне қатысты пікір білдірді

Бас прокурор Берік Асылов астаналық балабақшада болған ерекше қажеттіліктері бар баланы қорлау әрекетіне қатысты пікір білдірді, деп хабарлайды KAZ.NUR.KZ.

"Елордадағы инклюзивті балабақшада болған жантүршігерлік оқиға қайталанбауы тиіс. Балаларды қорлауға, жәбір көрсетуге жол бермеуіміз қажет", - дейді Берік Асылов өзінің Twitter-дегі жазбасында.

Бас прокурор бұл факті бойынша қозғалған қылмыстық істің тергеу барысы бақылауға алынғанын атап өтті. Ол сондай-ақ бүлдіршіндерді қорлағандар заң алдында жауап беретінін айтты.

Астанадағы инклюзивті балабақшада ерекше қажеттілігі бар бүлдіршіннің қорланғаны туралы әлеуметтік желілерден белгілі болған. Баланың анасы полицияға жүгінген.

Zakon.kz басылымының мәліметінше, аталған факті бойынша Астана қаласы "Алматы" АПБ қызметкерлері Қылмыстық кодекстің 140-бабымен қылмыстық іс қозғаған.