"Бір үйден 32 бала мектепке барады": 48 баласы бар қостанайлық отбасы жайлы не білеміз

Қостанай облысының Лисаков қаласында 48 баласы бар отбасы тұрады. Оның үшеуі – туған, 45-і – асырап алған балалары, деп хабарлайды Хабар 24 телеарнасы ресми сайтында.

Телеарнаның мәліметінше, өздері де көпбалалы отбасынан шыққан Рустам мен Гуля алғаш рет 1998 жылы Лисаковтағы жетімдер үйінен 7 баланы асырап алған. Одан кейін жыл сайын қосылып, бала саны 48-ге жеткен. Олардың үшеуі өз туған балалары.

Бүгінде солардың алды студент атанып, оқып жатса, кенжесі небәрі 3 жаста. Бір үйден 32 бала мектепке барады.

Осыншама жетімді бауырына басқан Рустам мен Гуля Шукуровтардың бар арманы – балаларына дұрыс тәрбие беріп, өсіріп, жеткізу.

"Біз үшін олардың әкім не ғалым болуы шарт емес, ең бастысы, бұрыс жолға түспей, дұрыс адам болғаны маңызды", - дейді көпбалалы әке Рустам Шукруов. 

Рустамның айтуынша, жұбайы екеуі бала тәрбиесінде ертеден қалыптасқан дәстүрді ұстанады.

"Ата-ананы сыйлау, үлкенге құрмет, кішіге ізет білдіру. Қамыққанға қамқор, жабыққанға жанашыр болу. Бірінші кезекте осы құндылықтарды саналарына сіңіруге тырысамыз", - дейді ол.

Қазіргі таңда Рустам – жеке кәсіпкер. Сауда орталығы бар. Ал жұбайы Гуля үй шаруасында. Көпбалалы отбасы бұрын сатып алған 5 қабатты үйдің толық 2 қабатында бала-шағасымен тұрады.

"Жеке коттедж учаскемізде бар. Сиыр, қой, ешкі, тауық, үйрек ұстаймыз. Туған 2 балам соның басында. Басқалары да сол жаққа барғанды қызық көреді", - дейді Рустам Шукуров.

Телеарнаның дерегінше, 48 баланың сегізі – студент. Біреуі ақылы оқуда. Алдағы 2 жылда тағы 12 бала мектеп бітірмек.

Мәтіннен қате тапсаңыз, бізге жазыңыз