Алматыда қаңтар оқиғасы бойынша 25 адамға сот үкімі шықты

Алматыда қаңтар оқиғасына байланысты 25 адамға сот үкімі шықты. Оларға бірден бірнеше қылмыстық бап бойынша айып тағылды, деп хабарлайды KAZ.NUR.KZ.

"Алматы соттары" Facebook-тегі ресми парақшасының мәліметінше, Алматы қаласы Бостандық ауданының №2 аудандық сотында 2022 жылғы қаңтар оқиғасы бойынша 25 сотталушыға қатысты қылмыстық ісі қаралды.

"Алматы соттары" дерегінше, 2022 жылғы 4-5 қаңтар аралығында Алматы қаласының түрлі бөліктерінде 25 сотталушы жаппай тәртіпсіздіктерге қатысып, аса ірі мөлшерде ұрлық жасады, тұрғын үй, қызметтік және өндірістік үй-жайларға заңсыз кіріп, ірі залал келтіре отырып көлік құралдарын айдап әкетті, қауіпті өндірістік нысаның аумағына, сондай-ақ арнайы органдар күзететін басқа да нысандарға заңсыз кірді, бұл елеулі залал тигізіп, басқа да ауыр зардаптарға әкеп соққан.

"Сондай-ақ олар алдын ала сөз байласу арқылы өздерінің оқ-дәрілерін, атыс қаруларын ұрлап әкеткен, төтенше жағдай жарияланған жерде жаппай тәртіпсіздіктер кезінде адамдар тобы алдын ала сөз байласып, билік өкілдерінің денсаулығына залал тигізіп, олардың мүлкін бүлдіргені және жойғаны анықталды", - деді сотта. ⠀

Алматы қаласы Бостандық ауданының №2 аудандық сотында жаза тағайындау кезінде мынадай мән-жайлар ескерілген:

Сотталушылардың кінәларын толық және жартылай мойындауы, бұрын сотталмағандықтары, жеке басы, жас мөлшері, құқық бұзушылық жасағанға дейінгі және одан кейінгі мінез-құлқы, кәмелетке толмаған балаларының болуы, қылмыстық құқық бұзушылықтың қоғамдық қауіптілігінің сипаты мен дәрежесі, қылмыстық құқық бұзушылықты төтенше жағдай кезінде жасауы.⠀

Сот үкімі бойынша 20 азаматқа Рақымшылық жасау туралы заң қолданылып, 9 айдан 1 жыл 9 айға дейінгі мерзімге шартты жаза тағайындалған. Ал 4 адамға рақымшылық туралы заң қолданылып, осыған байланысты олар жазадан босатылған. 1 азамат қайтыс болуына байланысты қылмыстық жауапкершіліктен босатылған.

Сот үкімі заңды күшіне енбеген.