Ішкі істер министрлігі түлектер мен ата-аналарға үндеу жасады

Ішкі істер министрлігі биылғы мектеп бітіру кештеріндегі қауіпсіздікті сақтау мақсатында түлектер мен олардың ата-аналарына үндеу жасады. Бұл туралы ІІМ жаңалықтары Telegram-дағы ресми арнасында хабарланды.

Медиа-порталдың мәліметінше, осы аптада елімізде түлектердің “мектеп бітіру кештері” өткізілуде. Былтырғы жылдары түлектердің катысуымен әр түрлі құқық бұзушылықтар тіркелген.

ІІМ өкілдері іс-шаралар өткізілетін орындарда құқықтық тәртіпті тиісінше қамтамасыз ету үшін әрбір оқу орнына полиция қызметкерлері және басшы құрам қатарынан жауаптылар бекітілгенін атап өтті.

Басылымынң жазуынша, қоғамдық тәртіпті және жол қауіпсіздігін қорғауды қамтамасыз ету мақсатында полицияның патрульдік нарядтары кеш өткізілетін орындарға барынша жақын орналастырылған.

Ішкі істер министрлігінен жедел басқару орталықтарының бейнебақылау камералары іске қосылғаны, жалпы аталған іс-шараларға 7 мыңнан астам полиция қызметкері жұмылдырылғаны хабарланды.

"Ата-аналардан және түлектердің өздерінен қоғамдық тәртіпті бұзбауды, жол жүрісі қағидаларын сақтауды, су қоймасында қауіпсіздік шараларын қабылдауды өтінеміз. Тәрбиешілер, ата-аналар және кәмелетке толмағандардың басқа да заңды өкілдері іс-шара аяқталғанға дейін түлектерге тұрақты бақылауды қамтамасыз етуі керек. Құрметті түлектер мен олардың ата-аналары, бұл мереке сіз үшін тек жағымды жағынан есте қалуы керек. Өзіңізді және жақындарыңызды сақтаңыз",- деді ІІМ ӘПК басқарма бастығы Әсет Оспанов.