Астана іргесіндегі өрт: өрт сөндірушілер үшінші тәулік қураған шөпті сөндіруге тырысуда

Астана қаласының өрт сөндірушілері елорда іргесінде қураған шөп өртін сөндіру жұмысын жалғастыруда. Өрттің аумағы 80 гектарды құрайды, деп хабарлайды Төтенше жағдайлар министрлігі ресми сайтында.

Ведомство мәліметінше, қазіргі таңда елордалық ТЖД, "Астана Орманы" бөлімшелерінің күшімен жекелеген өрт орындарын жырту және үнемі қарауылдау жұмыстарын жүргізуде.

Жалпы өртті сөндіру жұмыстары басталғалы бері авиация өрт ошақтарына 149 рет көлемі 447 тонна болатын су шашқан.

20 маусым күні сағат 20:16-да Қарағанды және Ақмола облыстарының ТЖД күштері мен құралдары үйлеріне қайтқан.

Өрт сөндіруге қазіргі уақытта барлығы 34 адам, 8 бірлік техника жұмылдырылған. Жергілікті жерде Өрт сөндіру штабы жұмысын жалғастыруда.

Еске сала кетсек, 19 маусымда еліміздің Төтенше жағдайлар министрлігі өрт сөндірушілер Қорғалжын тасжолы мен Қосшы қаласына апаратын айналма жолдың арасында жанып жатқан қураған шөпті сөндіріп жатқанын хабарлаған еді.

ТЖМ сол күні кешке 21:09-да өрт оқшауланғанын, өрттің жалпы ауданы 80 гектарды құрағанын, өртті толықтай сөндіру жұмысы жалғасып жатқанын мәлімдеген болатын.