"Дұрыс емес": діни басқарма домбыраны харам деп атаған видеоға қатысты мәлімдеме жасады

Әлеуметтік желіде домбыраны харам деп айтылғаны туралы видео тарады. Осыған қатысты Қазақстан діни басқармасы мәлімдеме жасады, деп хабарлайды KAZ.NUR.KZ.

"Әлеуметтік желіде кейбір іні-қарындастарымыздың "домбыра шерту, беташар жасау, келіннің сәлем салуы – харам" деген мағынада айтқан пікірі қоғамда түсінбеушілік тудыруда. Осыған байланысты азаматтар тарапынан Қазақстан мұсылмандары діни басқармасына сауалдар келіп түсуде.

Сан ғасырдан бері Ислам дінін ұстанып келе жатқан қазақ халқы ұлттық аспабымыз – домбыра арқылы ән, терме-толғау шырқап, тыңдаушыны имандылыққа, ізгілікке, адамгершілікке, Отанды қорғауға, ата-анамызды қадірлеуге шақырған.

Қазақстан мұсылмандары діни басқармасы әлеуметтік желі қолданушыларын "домбыра шерту, беташар жасау, сәлем салу – харам" деген мағынада біржақтама, негізсіз пікір айтып, халық арасында түсінбеушілік тудырмауға үндейді. Ұлттық құндылықтарға қарсы келу дұрыс емес екенін мәлімдейміз", - деп хабарлады ҚМДБ.

Айта кетелік, осы мәселеге қатысты танымал имам Нұрлан қажы Байжігітұлы да пікір білдірген болатын.