Түркістанда жекеменшік балабақшадағы жағдайдан кейін тәрбиеші жұмыстан босатылды

Әлеуметтік желіде Түркістан қаласындағы жекеменшік балабақшалардың бірінде болған оқиғаның бейнежазбасы тарады. Видео сипаттамасында кішкентай бүлдіршін балабақшада ересек адамнан соққы алғаны айтылады. Баланың ата-анасы құзырлы органдарға шағымданған. деп хабарлайды KAZ.NUR.KZ тілшісі.

Әлеуметтік желіде жарияланған видеодан ересек әйел балаға дөрекілік танытып жатқанын байқауға болады. Видео желі қолданушыларының наразылығын тудырды.

"Балабақша қызметкерлерін арнайы тексеруден өткізіп барып қабылдау қажет" - деп пікір білдірген желі қолданушылары.

Кейбірі мұндай қызметкерлерді қатаң жазалау керек дескен.

Оқиға 21 ақпанда Түркістан қаласындағы жекеменшік балабақшада болғаны анықталды. Бір жарым жастағы баласының бетіндегі қызарған дақтарды байқаған анасы балабақшадағы бейнебақылау камерасын қарап шыққан. Түркістан облыстық білім басқармасы баспасөз қызметінің мәліметінше, тәрбиеші балаға қол көтермеген, тек жұлқылаған көрінеді.

"Баланың бетінде қызарған белгіні байқаған ата-ана балабақшаның бейнебақылау камерасын қарап, баланы соқпағаны, алайда жұлқылағаны белгілі болды. Ата-ана бұл бойынша құзырлы органдарға шағымданды. Тәрбиеші өз өтініші негізінде жұмыстан босатылды", - делінген хабарламада.

Автор: Жанар Пердешқызы