"Су бөгетіне келетіндер қатары азаяр емес": Астана әкімдігі қала тұрғындарына үндеу жасады

Астана әкімдігі ескертуге қарамастан, елорда шетіндегі бөгетке баратын қала тұрғындары мен қонақтарына үндеу жасады. Билік өкілдерінің сөзінше, әдемі кадр үшін басын қауіпке тігіп, су реттейтін нысанға келетіндер қатары азаяр емес, деп хабарлайды КТК.

Қала шетінде орналасқан су реттеуіш нысанды халық осы көктемде қыдырып баратын көрікті жердің біріне айналдырған. Әкімдіктің хабарлауынша, кіруге тыйым салынғанына қарамастан, бүгінде бөгет аумағында серуендеп, селфи түсірушілер көбейген. Кейбір тұрғындар қауіпті жерге балаларын да ертіп апарады.

Әкімдік құрылысы аяқталмаған нысанды темірмен қоршап қойғанымен, әлдекімдер оны бұзып, емін-еркін кіріп-шығып жүр.

"Алдағы екі жылдың ішінде бұл жер туристік орынға айналуы мүмкін. Дегенмен қазір адамдардың, оның ішінде балалардың қауіпсіздігін қамтамасыз ету мақсатында барлық қала тұрғындарына бұл нысанды барып аралауға рұқсат етілмейді және ол жаққа бармауға шақырамыз", - деді Нұра ауданы әкімдігінің бөлім басшысы Ерлан Мырзахан.

Дереккөз: КТК.