Колонияға қайтып оралмай, басқа біреудің көлігіне мініп кеткен қазақстандыққа жаңа үкім шықты

Солтүстік Қазақстан облысында жазасын өтеуден жалтару және автокөлікті ұрлау түрінде қасақана құқықбұзушылық жасау туралы қылмыстық іс бойынша үкім шығарылды. Бұл туралы облыстық сотқа сілтеме жасаған KAZ.NUR.KZ хабарлайды.

Соттың Telegram-дағы ресми арнасына сәйкес, 2024 жылғы шілдеде Қызылжар аудандық сотында басқаға тиесілі автокөлікті айдап кеткені үшін (ҚР ҚК-нің 200-б. 1-б.), сонымен қатар айдауылсыз жүріп-тұру құқығын пайдаланатын сотталған адамның бас бостандығынан айыру түрiндегi жазасын одан әрi өтеуден жалтару мақсатында түзеу мекемесiне қайтып оралмауы (ҚК 427-б. 1-б.) бойынша сотталушыға қатысты қылмыстық іс қаралды.

"Сотталған азамат ең төменгі қауіпсіздік мекемесінде қылмыстық жазасын өтеу кезінде жұмыс орнында болған. Жұмыс күнінің соңында, сағат 17:00 кейін сотталған жұмыс орнының аумағынан шығып, мекеменің орналасқан жеріне келмеген. Сотталған түзеу мекемесінен тыс жерде жүргенде М.-ға тиесілі автокөлікті рұқсатсыз айдап кеткен", - делінген хабарламада.

2024 жылғы 14 маусымда сағат 15:40 шамасында жедел-іздестіру шараларын жүргізу кезінде мекеме қызметкерлері сотталған азаматты ұстады.

"Сотта сотталушының кінәсі дәлелденді", - делінген хабарда.

Бұл қылмысты сотталушы Солтүстік Қазақстан облысы Қызылжар аудандық сотының бұрынғы үкімі бойынша өтелмеген 2 жыл 4 ай 15 күндік жазасы бар жазасын толық өтемей тұрып жасаған.

"Қылмыстық құқық бұзушылықтардың жиынтығы бойынша, ҚР ҚК-нің 58-б. 3-б. негізінде Қазақстан Республикасының Қылмыстық кодексінің 200-б. 1-б., 427-б. 1-б. бойынша жаза тағайындалды. Бірінші жаза бойынша өтелмеген уақыттың болуын ескере отырып, ҚР ҚК 60-б. 4-б. 1-т. ережесі бойынша, 2022 жылғы 26 шілдедегі бұрынғы үкім бойынша жазаның өтелмеген бөлігін ішінара қосу арқылы, түпкілікті жаза 3 жыл бас бостандығынан айыру түріндегі жазаны қатаң тәртіптегі қылмыстық-атқару жүйесінің мекемесінде өтеу үшін тағайындалды", - деп атап өтілді сотта.

Үкім заңды күшіне енген жок.