Қазақстанның батысында тағы бір мұнай компаниясына қомақты айыппұл салынды

Еліміздегі мұнай компанияларының біріне жер қойнауын ұтымсыз пайдаланғаны үшін 673 миллион теңгеден астам айыппұл салынды, деп хабарлайды KAZ.NUR.KZ Атырау облысының прокуратурасына сілтеме жасап.

Өңірлік прокуратура мәліметінше, "ANACO" ЖШС 2018-2023 жылдар аралығында көлемі 4 237 248 м3 шикі газдың жоғалуына жол беріп, жер қойнауын ұтымсыз пайдаланған.

Прокуратура мұны "Жер қойнауы және жер қойнауын пайдалану туралы" кодекстің 125-бабы 2-тармағы мен 147-бабы 4-тармағының талаптарын өрескел бұзу деп есептейді. Заңға сәйкес, көмірсутектерді өндіру оның жоғалуын болдырмайтын әдістер мен тәсілдер арқылы жүзеге асырылуы керек.

Қадағалау актісінің негізінде Мұнай-газ кешеніндегі мемлекеттік инспекциясының батыс өңіраралық басқармасы мемлекетке келтірілген залал мөлшері 673 130 278 теңгені құрағанын анықтады. Жер қойнауын пайдаланушы ерікті түрде 285 000 000 теңге төледі.

Айта кетейік, осыған дейін 5 тамызда жер қойнауын пайдалану саласындағы тағы бір ірі айыппұл туралы жазған болатынбыз. Атырау облысының прокуратурасы "Каспий мұнай" АҚ кен орнын бұрғылау және пайдалану нәтижесінде 2021-2022 жылдары пайда болған 4500 тоннадан астам қауіпті қалдықтарды жинақтау лимитін алмағанын анықтаған еді. Ол үшін 13 млрд теңгеден астам көлемде әкімшілік айыппұл өндірілді.

Мәтіннен қате тапсаңыз, бізге жазыңыз