Өскеменде блефаропластикадан кейін әйел қайтыс болды: косметологтың ассистенті сотталды

Өскеменде косметолог құрбысынан ота кезінде көмекші болуын сұраған. Көмекші салған екпеден кейін косметологтың клиенті қайтыс болды. Сот істі қарады, деп хабарлайды YK-news.kz порталына сілтеме жасаған KAZ.NUR.KZ.

Басылымның мәліметінше, отадан кейін К. есімді дәрігер-косметолог клиенттің бетінде ісіну пайда болғандықтан, А. есімді ассистенттен оған укол салуды сұраған.

"Медициналық қызметке лицензиясы жоқ А. есімді көмекші пациентке үлгі ретінде лидокаин қосылған цефтриаксонды бұлшықет ішіне енгізді. Енгізілген екпеден кейін науқастың жағдайы нашарлады", - деп хабарлады Өскемен қаласының № 2 сотының баспасөз қызметі.

Жедел жәрдеммен облыстық мамандандырылған медициналық орталыққа жеткізілген әйел сол жерде көз жұмды.

№ 2 сот Қылмыстық кодекстің 322-бабы (Заңсыз медициналық және фармацевтикалық қызмет және есірткі немесе психотроптық заттарды алуға құқық беретін рецепттерді немесе өзге де құжаттарды заңсыз беру немесе қолдан жасау) істі қарап, А. есімді азаматшаға екі жарым жылға бас бостандығынан айыру жазасы тағайындалды. Сотталушы үш жылға медициналық қызметпен айналысу құқығынан айырылды.

Үкім әлі заңды күшіне енген жоқ деп жазады басылым.

Мәтіннен қате тапсаңыз, бізге жазыңыз