Қазақстан шекарасында бензин мен дизель отынын шығаруға бақылау күшейтіледі

Премьер-министрдің бірінші орынбасары Роман Скляр Қазақстанның ішкі нарығын жанар-жағармаймен қамтамасыз ету мәселелері бойынша кеңес өткізді. Бұл туралы үкіметке сілтеме жасаған KAZ.NUR.KZ хабарлайды.

Үкімет ақпаратынша, жанар-жағармай нарығындағы ағымдағы жағдайды қарау нәтижесінде елдің оңтүстік өңірлерінде АИ-92, АИ-95 маркалы бензин мен дизель отынын тұтынудың айтарлықтай өскені байқалды.

"Бұған негізгі себеп болып отырған жағдайлар – көрші елдермен салыстырғанда, Қазақстандағы баға айырмашылығына байланысты мұнай өнімдерінің сыртқа кетуі және "сұр экспорт". Бұдан бөлек, соңғы уақытта шекарада сұранысқа ие мұнай өнімдерінің "бүркеншік тауарлар" ретінде экспортталғаны тіркелген", - делінген хабарламада.

Ішкі нарықта тапшылықты болдырмау мақсатында Қаржылық мониторинг агенттігі, Ұлттық қауіпсіздік комитетінің шекаралық қызметі, Қаржы министрлігі мемлекеттік кірістер коминтеті және басқа да мүдделі мемлекеттік органдармен бірлесіп шекаралық өткелдерде жанар-жағармай әкетуді бақылауды күшейту тапсырылды.

Сонымен қатар премьер-министрдің бірінші орынбасары Энергетика министрлігіне экспорттауға рұқсат етілген мұнай өнімдерінің тізімін жаңартуды және отандық мұнай өңдеу зауыттарында мұнай өнімдерінің тұрақты өндірісін қамтамасыз етуді тапсырды.