Ата-енесінің атынан миллиондаған несие алған қызылордалық келіншек сотталды

Қызылордада күйеуінің ата-анасының атына алаяқтық жолмен несие алған қызға қатысты іс қаралды. Ол кінәлі деп танылып, үкім шығарылды, деп хабарлайды облыстық сотқа сілтеме жасаған KAZ.NUR.KZ.

Қызылорда қаласының №2 сотында Қазақстан Республикасының Қылмыстық кодексінің 190-бабының 3-бөлігінің 1-4-тармақтарымен сотталушы Е.-ге қатысты қылмыстық іс қаралды.

Сотталушы Е. қайын атасы мен енесінің ақпараттық жүйеден бейхабар екенін, қарттық жасын пайдаланып, бейнекамераға түсіру арқылы есепшоттарына заңсыз кіріп, ұялы телефонындағы мобильді қосымша арқылы қайын атасы Ж.-ның атынан 4 626 167 теңге, енесі К.-нің атынан 2 190 000 теңге мүліктік несиелер рәсімдеп, оны ақшаға айналдырып, бас пайдасына жаратқан.

Нәтижесінде, жәбірленушілер Ж.-ға 4 626 167 теңге, К.-ге 2 190 000 теңге мүліктік шығын келтірген.

Сотталушының қылмыстық әрекеті өзінің кінәсін мойындаған жауабымен, жәбірленушілердің жауаптарымен, банктік анықтамалармен, аударым түбіртектерімен және іс бойынша басқа да құжаттармен дәлелденген.

Сотталушы Е. мен жәбірленушілер Ж. және К. арасында кінәні мойындау туралы мәміле нысанындағы процестік келісім жасалған.

Басты сот талқылауында жәбірленуші Ж. сотталушы Е.-ден 4 626 167 теңге залалды өндіруді сұраған, ал жәбірленуші К. талап қоюдан бас тартқан.

Сот үкімімен сотталушы кінәлі деп танылып, 3 жыл 6 ай мерзімге бас бостандығын шектеу жазасы тағайындалып, пробациялық бақылау белгіленген.

Талапкер Ж.-ның пайдасына 4 626 167 теңге өндірілген.