Шымкентте апат салдарынан ықшамаудандардың бірі жарықсыз қалды

9 қарашада Шымкент қаласының "Шымсити" тұрғын үй массивінде электр энергиясы жаппай сөндірілді. Оған себеп – 110 мың вольт қысымға ие кабельді желінің ақауы, деп жазады Otyrar.kz.

Апат салдарынан 1658 абонент жарықсыз қалды, оның 12-сі заңды тұлғалар. Электр энергиясының шығыны 3750 кВт/сағ құраған.

Оқиға үшінші тарап ұйымының келісілмеген жер жұмыстарын жүргізу кезінде болған. Зақымдалған кабель "Бозарық" (220 кВ) қосалқы станциясы мен "Астана-1" қосалқы станциясын қосады.

Айта кетейік, Шымкент Энергетика және инфрақұрылымды дамыту басқармасының теңгеріміндегі желі ЖШС-лардың біріне сенімгерлік басқаруға берілген.

Басылым мәліметінше, оқиға орнына істің мән-жайын тексеру үшін Шымкент қаласы бойынша анықтау басқармасының полиция қызметкерлері шақырылған. Ал ЖШС өкілдері электр энергиясын қалыпқа келтіру бойынша шұғыл әрекет еткен.