Алматы облысында ауыл шаруашылығына арналған жерде пайдалы қазбалар өндірілген

Алматы облысында мақсатты пайдаланылмаған 99 гектар жер мемлекет меншігіне қайтарылды. Бұл туралы Ауыл шаруашылығы министрлігінің сайтында хабарланды.

"АШМ ЖРБК Алматы облысының жер ресурстарын басқару департаменті ауданы 99 га жер учаскесін мемлекет меншігіне қайтару туралы шешім қабылдады. Бұл шешім осы учаскенің мақсатты пайдаланылмауына байланысты болды", - делінген хабарда.

Тексеру барысында Іле ауданының аумағында жер пайдаланушының ауыл шаруашылығы мақсатындағы жер учаскесін оның мақсатына сәйкес пайдаланбайтыны және оның орнына пайдалы қазбаларды өндірумен айналысатыны анықталған.

Кәсіпорынға әкімшілік айыппұл салынып, анықталған бұзушылықтарды жою туралы нұсқама берілді.

Сотқа дейінгі реттеу процесінде ЖШС пайдаланылмаған жер учаскесін мемлекеттік жер қорына өз еркімен қайтару туралы шешім қабылдады.

Еске салсақ, бұған дейін бас прокурор Берік Асылов мемлекет басшысы Қасым-Жомарт Тоқаевқа берген есебінде кейінгі 4 жылда мемлекетке 17 миллион гектар жер қайтарылғанын айтқан еді.